|
英倫曾於得生團契戒毒
現為得生團契事工導師，野外歷奇導師
記：不如講講你以前的生活是怎樣的？
倫：其實我小學的時候成績都算幾好，在運動方面又有幾好的成績，但呢D東西就正係將我推進死陰幽谷的原因。
到讀中學的時候在屯門區一間都算幾好的中學讀書，冇耐就認識了一些黑社會的朋友，那時其實自己都知道呢D人唔應該去認識，但當時的我實在係太過自負，成日認為自己可以控制一切，我心想：「駛乜驚呀！」就跟了佢地，之後就開始吸煙，跟住就試第一次毒品。
在中四的時候，自己就犯了一宗傷人的案件，入了監房，出來之後就接受感化令。
在當中自己都有悔改的心，所以在守感化的期間，我都有繼續讀書，會考都總算有幾科合格，但守完感化令之後生活就開始再次沉淪。
我開始繼續去吸毒，很快就上了毒癮，每一日都過住一些去偷去搶的生活，又成日問身邊的朋友借錢，所以身邊的朋友就一個一個咁離開自己；而在屋企裏面我亦有偷屋企人錢的習慣，所以連屋企人都唔知點去對待我。
記：咁你有無諗過要戒？
倫：其實當時自己好想去戒，但每逢毒癮發作的時候就會選擇放棄。
而在呢段時間自己都試過用一些好不智的方法去戒毒，就係用其他毒品去取代白粉，所以當時每日都落disco食一些軟性毒品，令到成個人都成日瘋瘋癲癲，結果都係擺脫唔到毒品的控制。
|
記：點解你會來到得生？
倫：終於有一次，自己真係自覺已到了一個無法自拔的階段，所以決定離家出走，將身上所有值錢的東西都押晒。
因為當時心想，享受完最後呢D毒品就跳樓死了算吧！但到我上了天台，雙腳踏上了天台邊緣的時候，我的心裏唔知係怕死定係真係醒覺，我在諗若果我就咁樣跳落去都唔能夠解決問題，仲會比我的父母帶來更大的問題同壓力，所以我都冇跳落去。
之後的我就更加迷茫，因為心裏知道連死都唔能夠解決呢個問題。
過了一陣，我係街上碰見爸爸同媽媽，佢立刻叫我返屋企問我：「你想點樣解決？」我就同佢提出：「我想搵一個時間較長的地方去戒毒！」之後在我姐姐的一個朋友介紹下就搵到了得生團契。
記：係得生有乜感受？點解你會有改變？
倫：入到得團契之後我相信了耶穌，佢真係幫助了我，將我毒癮發作的痛苦都減到最少，令我可以過度了呢段最辛苦的日子，那時我真係感受到在主裏面那份真正的平安。
到而家我繼續留在得生團契事奉，都係想用自己過去的一些經歷去幫助其他年青人去戒毒，當中亦可以令到自己更有成長。我相信呢D都係主比我經歷的，感謝主！
記：有冇說話可以勉勵時下的青年人？
倫：唔好試第一啖毒品，試一啖真係會上癮，同埋要聽多D、接受別人的意見。
|
